Müsavatçı gəncin həbsi: nə baş verir?
Barəsində 4 aylıq həbs qətimkan tədbiri seçilən müsavatçı gənc Elvin Paşayev narkotik maddənin satışında ittiham olunur. Bunu Turan-a vəkil Nemət Kərimli deyib.
E.Paşayev yanvarın 23-də saxlanılıb. Həmin vaxtdan yanvarın 25-nə kimi valideynləri övladları barəsində hüquq mühafizə orqanlarından məlumat ala bilməyiblər. Yanvarın 26-da isə Nərimanov Rayon Məhkəməsi E.Paşayevin barəsində 4 ay həbs qətimkan tədbiri seçib.
Elvin Paşayev Müsavat Partiyası Qubadlı rayon təşkilatının və partiyanın Gənclər Təşkilatının üzvüdür. Sumqayıt sakinidir. Sumqayıt Dövlət Universitetinin məzunudur, ixtisasca filoloqdur. “Hədəf” hazırlıq kursunda müəllim işləyir.
Yanvarın 27-də Müsavat Partiyası məsələ ilə bağlı bəyanat yayıb. Bəyanatda deyilir ki, Elvin Paşayevin itkin düşməsi haqqında onun ailə üzvləri tərəfindən Sumqayıt Şəhər Polis İdarəsinə və Daxili İşlər Nazirliyinin “102” xidmətinə müraciətlər olunsa da, bir neçə gün ərzində onun saxlanılması barədə heç bir məlumat verilməyib: “Yanvarın 26-da isə Elvin Paşayevin yanvarın 23-də Sumqayıtda saxlanıldığı və cibindən 65 qram tiryək çıxması iddiası ilə barəsində 4 ay həbs qətimkan tədbiri seçildiyi məlum olub.
Müsavat Partiyası gənc müsavatçı Elvin Paşayevin həbsinin siyasi məqsəd daşıdığı, bu həbsin onun sosial şəbəkələrdə ölkədə baş verən rüşvətxorluq faktlarını açıqlamasına görə həyata keçirildiyi qənaətindədir. Müxalifətçi gənclərin etirazlarının qarşısının alınması, onların narkotik iddiası ilə həbs edilməsi artıq ənənə halını alır. Bu fakt həm də ölkədə yaranan etiraz dalğasının qarşısının alınması, cəmiyyətdə xof mühitinin yaradılması istiqamətində hakimiyyətin atdığı addımlardan biridir.
Müsavat Partiyası bu hadisəni qətiyyətlə pisləyir və Elvin Paşayevin və digər siyasi məhbusların dərhal azad edilməsini tələb edir”.
