Krımın Ukraynaya qaytarılması üzrə xidmət yaradılır
Yanvarın 21-də Ukrayna prezidenti Pyotr Poroşenko Rusiyanın işğal edərək özünə birləşdirdiyi Krım bölgəsinin qaytarılması məsələləri üzrə xidmət yaradılmasına fərman verib. Bu xidmət Ukrayna prezidentinin Krım nümayəndəliyinin tərkibində yaradılır.
2014-cü ilin fevralından Rusiya Ukraynanın ərazi bütövlüyünü pozub, Krım bölgəsini hərbi güclə tutaraq özünə birləşdirib, Donbas vilayətinin bir hissəsini işğal edib.
Novator.az xəbər verir ki, Poroşenkonun fərmanına əsasən, nümayəndəliyin yenilənmiş strukturunda müvəqqəti işğal olunmuş ərazilərdən köçkün düşən vətəndaşlarla iş üzrə, beynəlxalq əlaqələr üzrə və Krım Muxtar Respublikasının Ukraynaya təkrar inteqrasiyası, işğaldan azad olunması məsələləri üzrə qurumlar yer alacaq.
Ukrayna prezidentinin Krım nümayəndəliyi Xersonda yerləşəcək, onun bəzi qurumları isə Kiyevdə fəaliyyət göstərəcək.
