Dünyada sosial təbəqələşmə kəskinləşir
Dünyanın ən varlı insanlarının sərvətinin həcmi 2010-cu ildən bəri 0,5 trilyon dollar artaraq 1,76 trilyon dollara çatıb. Bəşəriyyətin ən aztəminatlı hissəsi isə eyni müddətdə öz sərvətinin 41 faizini itirərək təqribən 1 trilyon dollar yoxsullaşıb.
Yoxsulluğa qarşı mübarizə təşkilatlarının beynəlxalq birliyi (Oxfam) bu məlumatı Davosda Dünya İqtisadi Forumunun açılışı ərəfəsində dərc edilmiş məruzəsində yayıb.
Oxfam birliyinin hesablamalarına görə, planetin ən varlı 62 sakininin əmlakının ümumi dəyəri ən yoxsul 3,6 milyard nəfərin əmlakının ümumi dəyərinə bərabərdir. Yoxsullar və varlılar arasında təbəqələşmə fasiləsiz kəskinləşir. Bu qeyri-bərabərliyin səbəblərindən biri ofşor zonaların genişlənməsidir. Nəticədə hədsiz varlı insanlar vergidən yayınır.
Oxfam birliyinin məruzəsində göstərilir ki, ifrat zənginlərlə yoxsullar arasında təbəqələşmə problemini həll etmək üçün iqtisadi və maliyyə sistemlərində islahatlar aparılmalı, ofşor zonalar bağlanmalı, qlobal konsernlər mənfəət əldə etdiyi yerdə vergi ödəməyə məcbur olunmalıdır.
Vüqar Seyidov
AZƏRTAC-ın xüsusi müxbiri, Berlin
