Sabiq müstəntiqə cinayət işi qaldırılıb
Zərdab Rayon Prokurorluğunun sabiq müstəntiqi Rüfət Səfərova cinayət işinin qaldırıldığı təsdiqlənib. APA bildirir ki, Baş Prokuror yanında Korrupsiyaya Qarşı Mübarizə Baş İdarəsinin rəisi Kamran Əliyev yanvarın 15-də jurnalistlərə bu haqda məlumat verib. Kamran Əliyev deyib ki, Korrupsiyaya Qarşı Mübarizə Baş İdarəsinə Rüfət Səfərovla bağlı müxtəlif müraciətlər daxil olub, keçmiş müstəntiqə Cinayət Məcəlləsinin 311-ci (rüşvət alma) maddəsi ilə cinayət işi başlanıb, istintaq gedir.
Müdafiə Nazirliyi mətbuat xidmətinin keçmiş rəisi Eldar Sabiroğlunun övladı olan Rüfət Səfərov ötən ay baş prokuror Zakir Qaralova istefa ərizəsi yazaraq vəzifəsindən istefa verdiyini bəyan edib. O, ölkədəki kütləvi ədalətsizliyə və atasına qarşı haqsız hücumlara etiraz əlaməti olaraq belə addım atdığını vurğulayıb.
Baş Prokurorluğun yaydığı məlumatda isə bildirilib ki, Zərdab Rayon Prokurorluğunun müstəntiqi Rüfət Səfərov “Prokurorluq haqqında” qanunun 34-cü və “Azərbaycan Respublikası Prokurorluğu işçilərinin etik davranış kodeksi”nin 30 və 31-ci maddələrinin tələblərini kobud surətdə pozaraq prokuror və ya müstəntiq vəzifəsi ilə bir araya sığmayan hərəkətlərə yol verdiyinə görə prokurorluq orqanlarından xaric olunub.
Yeni Azərbaycan Partiyasının üzvü olan Eldar Sabiroğlu son vaxtlar mediaya açıqlamalarında hakimiyyətin ayrı-ayrı yüksək fiqurlarını, ən çox da Prezident Administrasiyasının rəhbəri Ramiz Mehdiyevi sərt tənqid edir. Partiyanın ayrı-ayrı məsul şəxsləri buna cavab olaraq Eldar Sabiroğlunu qınayan açıqlamalar verirlər və onun ittihamlarının əsassız olduğunu vurğulayırlar.
