Ekspert: “30 dollara yuvarlanan nefti emal edib 300 dollara satardıq”
Yanvarın 15-i dünya birjalarında neftin qiyməti müxtəlif istiqamətlərdə dəyişib. Nyu-York birjasında “Layt” markalı neftin bir barreli 0,06 dollar bahalaşaraq 30,54 dollar, London birjasında “Brent” markalı neftin bir barrelinin qiyməti 0,18 dollar artaraq 30,49 dollar olub.
AZƏRTAC bildirir ki, “AzəriLayt” markalı neftin bir barreli isə 0,01 dollar ucuzlaşaraq 31,54 dollara düşüb.
Bu arada iqtisadçı ekspert Natiq Cəfərli bir barrel neftin istehsal yolu ilə gətirə biləcəyi gəlirləri hesablayıb. Transparency.az-ın məlumatına görə, ekspert yazır: “Bir barrel neft 159 litrdir, emaldan sonra 168 litr olur. Emal nəticəsində həmin həcmdə neftdən 102 litr benzin, 30 litr dizel yanacağı, 25 litr aviasiya kerosini, 6,8 litr mazut, 1 litr maşın yağı, 120 ədəd şam alınır.
Hökumət 22 ildə böyük, müasir neftayırma və neft-kimya zavodu tiksəydi, indi qiyməti 30 dollara yuvarlanan nefti emal edib 300 dollara satardıq. Tək elə 120 ədəd şamı 25 sentdən satsaydıq, həmin 30 dollar edərdi”.
