Bayraq Meydanı Bulvar İdarəsinə verildi, təyinat oldu
Prezident İlham Əliyev Nazirlər Kabineti yanında Dövlət Bayrağı Meydanı Kompleksi İdarəsinin və Nazirlər Kabineti yanında Dənizkənarı Bulvar İdarəsinin bəzi məsələləri haqqında fərman imzalayıb. Transparency.az xəbər verir ki, fərmanla Dövlət Bayrağı Meydanı Kompleksi İdarəsi və Dənizkənarı Bulvar İdarəsi birləşdirilir, onların əsasında Nazirlər Kabineti yanında Dənizkənarı Bulvar İdarəsi yaradılır.
Bakı şəhərindəki Dövlət Bayrağı Meydanı Kompleksinin vəziyyəti, fəaliyyəti, perspektiv inkişafı və mühafizəsi üzrə tədbirlərin yerinə yetirilməsinə dövlət nəzarəti, kompleksin fəaliyyətinin təmin olunması, habelə kompleksə dair proqnozlaşdırma və planlaşdırma işlərinin təşkili və kompleksin perspektiv inkişafının təmin olunması Dənizkənarı Bulvar İdarəsinin səlahiyyətinə verilir. Dövlət Bayrağı Meydanı Kompleksi İdarəsinin vəzifə və hüquqları, habelə istifadəsində olan dövlət əmlakı Dənizkənarı Bulvar İdarəsinə keçir.
Dövlət başçısının sərəncamları ilə Əfqan Sərdar oğlu Şahmarov Dənizkənarı Bulvar İdarəsinin rəisi vəzifəsindən azad edilib, həmin posta İlqar Əziz oğlu Mustafayev təyin olunub.
