ABŞ-da müsəlmanların sayı iki dəfədən çox artacaq
2050-ci ilə qədər ABŞ-da müsəlmanların sayı 8 milyon 100 min nəfərə çatacaq. Novator.az bildirir ki, ABŞ-ın “Pew Research Center” sosial araşdırmalar təşkilatı belə proqnoz verib.
Hazırda ABŞ-da 322 milyon insan yaşayır. Əhalinin dini mənsubiyyəti barədə rəsmi statistika olmasa da, müstəqil araşdırmaçılar bildirirlər ki, müsəlmanlar hazırda ABŞ əhalisinin 1%-ni təşkil edir. Bu, əhalinin 3 milyon 300 min nəfərinin müsəlman olması deməkdir. Əgər “Pew Research Center” təşkilatının proqnozu doğrularsa, müsəlmanların sayı 8 milyon 100 min nəfərə çatarsa, ABŞ əhalisinin 2,1%-i müsəlmanlardan ibarət olacaq.
Sosioloqların ehtimalına görə, 35 il ərzində ABŞ-ın müsəlman əhalisi yəhudi və hindulara nisbətdə daha sürətlə artacaq. Qeyri-rəsmi hesablamalara görə, hazırda ABŞ-da 5 milyon 700 min nəfər yəhudi, 2 milyon 100 min nəfər hindu yaşayır.
Tədqiqatçıların fikrincə, müsəlmanların artımında iki faktor əsas rol oynayacaq: müsəlman miqrantların sayının artması və ABŞ-da digər dinlərin nümayəndələri ilə müqayisədə müsəlman ailələrdə uşaqların çox olması.
