Münaqişə üzündən 24 milyon uşaq məktəbə getmir
Dünyada münaqişələrin hökm sürdüyü 22 ölkədə 24 milyon uşaq məktəbə getmir. Novator.az xəbər verir ki, BMT-nin Uşaq Fondunun (UNICEF) açıqlamasında belə deyilir.
UNICEF-in direktor müavini Co Bourn bildirib ki, münaqişə olan ölkələrdə uşaqlar evlərindən, ailə üzvlərindən, dostlarından, təhlükəsizlikdən məhrumdurlar: “İndi yazıb-oxumağı öyrənmək imkanı olmayan uşaqların gələcəyi də təhlükədədir. Onlar böyüyəndə cəmiyyətə, iqtisadiyyata töhfə verə bilməyəcəklər”.
UNICEF-in məlumatına görə, məktəbə getmək imkanı olmayan uşaqların çoxu Cənubi Sudan, Niger, Sudan və Əfqanıstanda yaşayır.
2015-ci ildə 200 min uşaq Avropa İttifaqı ölkələrindən sığınacaq istəyib. Dünyada 30 milyon uşaq münaqişə üzündən evini tərk edib. Münaqişələrin hökm sürdüyü bölgələrdə 250 milyondan çox uşaq yaşayır.
