Əməliyyat müşavirəsində cəza rəqəmləri açıqlanıb
Yanvarın 7-si Baş Prokurorluqda mərkəzi aparatın rəhbər heyətinin iştirakı ilə əməliyyat müşavirəsi keçirilib. Rəsmi məlumata görə, müşavirədə qeyd olunub ki, ötən il prokurorluq orqanları bir çox ağır, mürəkkəb və çox epizodlu cinayət işlərinin istintaqını tamamlayıb, qəsdən adam öldürmə və qəsdən adam öldürməyə cəhd cinayətlərinin açılması, bu cinayətləri törətmiş şəxslərin məsuliyyətə cəlb edilməsi istiqamətində müəyyən işlər görüb. O cümlədən qeyri-aşkarlıq şəraitdə törədilmiş xüsusilə ağır cinayətlər isti izlərlə açılıb.
Tədbirdə bildirilib ki, hesabat dövründə prokurorluq orqanları üzrə xidməti, icra və əmək intizamının pozuntusu hallarına və digər xətalara yol verdiklərinə görə 37 əməkdaş intizam məsuliyyətinə cəlb edilib, o cümlədən 7 nəfər prokurorluq orqanlarından xaric olunub.
Baş Prokurorluğun yaydığı məlumata görə, 2016-cı il yanvarın 6-da Bakının Nəsimi rayonu, Sumqayıt şəhəri və Qubadlı rayon prokurorluqlarında daxili nizam-intizam qaydalarına riayət edilməsi və işə davamiyyət vəziyyəti yoxlanarkən xidməti və əmək intizamının kobud pozuntusu hallarına yol verdiklərinə görə 2 əməkdaş prokurorluq orqanlarından xaric edilib.
