“Twitter” 140 işarəni 10 minə çatdırmağı düşünür
“Twitter” şəbəkəsində istifadəçilərin ismarış yazması üçün məhdudiyyət var: bir ismarış 140 işarədən artıq ola bilməz. Novator.az xəbər verir ki, şirkət rəhbərliyi bu məhdudiyyəti aradan qaldırıb işarə sayını 10 minə çatdırmağı düşünür. Dəyişiklik mart ayından qüvvəyə minə bilər.
“Twitter”in rəhbəri Cek Dörsi belə bir planın olduğunu təsdiqləyib. O bildirib ki, şirkət istifadəçilərə bir ismarışda daha çox yazmaq imkanı yaratmaq niyyətindədir, ona görə də işarə sayı 70 dəfə artırıla bilər. Cek Dörsi deyib ki, şəbəkə istifadəçiləri ismarışlara uzun mətnlərin şəklini çəkib (Screenshort) qoşmaqla onsuz da 140 işarədən kənara çıxmağı öyrəniblər.
İsmarışlara 140 işarəlik məhdudiyyət sosial şəbəkə işə düşəndən – 2006-cı ildən tətbiq olunur. İstifadəçilərin bir hissəsi bu məhdudiyyəti dəstəkləsə də, əksəriyyəti daha geniş imkan tələb edir.
