Barak Obama İlham Əliyevə dəvət göndərib
“2015-ci ilin dekabr ayının 3-də ABŞ prezidenti Barak Obama Azərbaycan prezidenti İlham Əliyevə məktub göndərib. Məktubunda ABŞ prezidenti Azərbaycan prezidentini 2016-cı ildə Vaşinqtona IV Nüvə Təhlükəsizliyi Sammitinə dəvət edib”. Novator.az xəbər verir ki, bunu 2016-cı il yanvarın 6-da Prezident Administrasiyası rəhbərinin müavini, xarici əlaqələr şöbəsinin müdiri Novruz Məmmədov “Twitter” şəbəkəsində yazıb.
Novruz Məmmədovun yazdığına görə, Barak Obama İlham Əliyevə məktubunda bildirib: “Azərbaycan qlobal nüvə təhlükəsizliyi arxitekturasına qətiyyətli dəstək nümayiş etdirir. Ümidvaram ki, Azərbaycan nüvə və radioloji töküntülərinin qadağası üçün xüsusi səylərini davam etdirəcək”.
IV Nüvə Təhlükəsizliyi Sammiti mart ayının sonunda keçiriləcək.
III Nüvə Təhlükəsizliyi Sammiti 2014-cü ilin martında Niderland Krallığının Haaqa şəhərində olub. Azərbaycan prezidenti İlham Əliyev həmin sammitdə iştirak edib və nitq söyləyib.
