Əli Kərimli təkliflərini açıqlayıb
AXCP sədri Əli Kərimli “Facebook” şəbəkəsində hakimiyyətə böhrandan çıxış yolları təklif edib. “Azadlıq” qəzetində dərc olunmuş təkliflər paketində AXCP sədri qeyd edir ki, köklü siyasi-iqtisadi islahatlar olmadan sırf cari iqtisadi tədbirlərlə böhrandan çıxmaq mümkün deyil. Onun fikrincə, prezident İlham Əliyev ölkədə dərin siyasi və iqtisadi islahatlara hazır olduğunu bəyan etməlidir: “Elan etməlidir ki, müstəqil məhkəmə hakimiyyətinin formalaşmasından, Seçki Məcəlləsinin islahatına və yeni məcəllə ilə parlament və prezident seçkilərinin keçirilməsinə qədər köklü islahatlara hazırdır. Bu bəyanatlarının inandırıcı olması üçün ilk xoşməramlı addım kimi 93 nəfər siyasi məhbusun hamısı əfvlə həbsdən azad edilməlidir”.
Müxalif lider korrupsiya və rüşvətxorluğu inzibati qaydada dayandırmağa çağırır: “Birinci və sürətlə görülməli iş korrupsiyanı durdurmaq olmalıdır. Təkcə bu tədbir mal və xidmətlər bazarında xeyli ucuzluq yaradacaq, milyonlarla insanın əl-qolunu açacaq, onların təşəbbüskarlığına imkan verəcək.
İdxalda və ixracda inhisarçılıq da dərhal, inzibati qaydada ləğv edilməlidir. Hər bir şəxsin heç kimdən icazə almadan, heç kimə haqq vermədən istədiyi məhsulları Azərbaycana gətirmək və istədiyi məhsulları xaricə çıxarmaq hüququ dərhal təmin olunmalıdır. Bu tədbirin həyata keçirilməsi də bazarda xeyli ucuzlaşmaya və işgüzar fəallığın artmasına səbəb olacaq.
İstehsalda, xidmət və bank sektorunda inhisarçılığın aradan qaldırılması da maksimum sürətlənməlidir. İnhisarçılıq faktiki ləğv olunana qədər isə monopolistlərin üzərində ciddi inzibati nəzarət olmalıdır ki, topdansatış qiymətlərini qaldırmasınlar.
Maaşların, pensiyaların, müavinətlərin, tələbə təqaüdlərinin həqiqi inflyasiyaya uyğun (hökumətin iddia etdiyi 4 faizlik inflyasiya sadəcə ciddi deyil) qaldırılması, dollarla krediti olanlara borclarını Qazaxıstanda olduğu kimi devalvasiyadan əvvəlki məzənnə ilə ödəmək imkanının verilməsi, ali məktəblərdə təhsil haqlarının artırılmaması və digər tədbirlər nəzərdə tutula bilər. Təbii inhisarçıların mal və xidmətlərinin Dövlət Tarif Şurasında tənzimlənən qiymətləri qaldırılmamalıdır.
Azad rəqabət mühiti, mülkiyyətin toxunulmazlığı, uzunmüddətli və ucuz kreditlərə çıxış imkanı təmin edilməli, sahibkarların qarşısındakı bürokratik əngəllər qaldırılmalı, dövlət satınalmaları istisnasız olaraq açıq hərraclar vasitəsilə və şəffaf qaydada həyata keçirilməlidir.
Sürətlə vergi islahatı həyata keçirilməlidir. Vergi islahatının fəlsəfəsi vergi dərəcələrini aşağı salmaq, vergiləri sadələşdirmək və vergi bazasını genişləndirmək olmalıdır. İndiyə qədər vergidən yayınan imtiyazlı kölgə iqtisadiyyatı vergiyə cəlb edilməli, fond pulları və ikili mühasibatlıq ləğv edilməlidir.
Ölkədə daxili istehsalın inkişafı, ölkə iqtisadiyyatının idxaldan asılılığının minimuma endirilməsi (idxalın azalması avtomatik olaraq ölkədən dollar axınını xeyli zəiflədəcək) də böhrana qarşı proqramın mühüm tərkib hissəsi olmalıdır. Ölkə daxilində istehsalı mümkün olan malların istehsalı təmin edilməlidir. Bu məqsədlə Dövlət İnvestisiya Fondunun vəsaitlərindən istifadə edilməli, sahibkarlar məqsədli, uzunmüddətli, ucuz kreditlə təmin olunmalıdır. Yerli istehsalı stimullaşdırmaq üçün sahibkarlara dövlət səviyyəsində kömək edilməlidir ki, onlar xarici biznes ortaqları tapa bilsin. Dövlət belə birgə müəssisələrin yaradılmasını dəstəkləməlidir.
Kənd təsərrüfatına subsidiyalar artırılmalı, subsidiyaların mənimsənilmədən, məqsədəuyğun istifadəsi üçün mexanizmlər işlənməli, fermerlər ucuz və uzunmüddətli kreditlə təmin edilməlidir.
Yanacağın qiyməti dərhal və əhəmiyyətli şəkildə aşağı salınmalıdır. Hökumət xeyli müddətdir ki, benzini və digər yanacaq növlərini əhaliyə nəinki maya dəyərindən, hətta xaricə satdığı qiymətdən də baha satır. Əmtəələrin qiymətlərinin müəyyən hissəsi enerji daşıyıcılarının qiyməti hesabına formalaşır. Yanacağın qiymətinin aşağı salınması avtomatik olaraq mal və xidmətlərin xeyli ucuzlaşmasına səbəb olacaq.
Ölkəyə sərmayə axınını təmin etmək lazımdır. Xarici banklar ölkəyə buraxılmalı, nüfuzlu beynəlxalq iqtisadi və siyasi qurumlarla münasibətlər normallaşmalı, ölkəyə xarici investisiya və kreditlərin önü açılmalıdır. Yerli sərmayəçilərin böhrana qarşı tədbirlərə etimadını qazanmaq üçün siyasi islahatların anonsunu vermək lazımdır”.
50 yaşlı Əli Kərimli Əbülfəz Elçibəy hakimiyyəti zamanı (1992-1993) Prezident Aparatının ərazi idarəetmə orqanları ilə iş şöbəsinin müdiri və dövlət katibi vəzifələrində çalışıb. 1993-cü ildən AXC sədrinin siyasi məsələlər üzrə müavini, daha sonra AXCP sədrinin birinci müavini olub. 1995 və 2000-ci illərdə Milli Məclisin deputatı seçilib. 2000-ci ildən AXCP-yə rəhbərlik edir.
