“Nərgiz” Mükafatı İlkin Rüstəmzadəyə verildi
Dekabrın 28-də Müsavat Partiyasının qərargahında “Nərgiz” Mükafatının təqdimetmə mərasimi keçirilib.
Musavat.com xəbər verir ki, tədbirdə ilk olaraq mərhum jurnalist Nərgiz Yaqublunun həyatı haqqında məlumat verilib. Müsavat Məclisinin sədri Nüşabə Sadıqlı mükafatla bağlı fikirlərini bildirib: “Mükafat fəal gənclərə, junalistlərə, ictimai təşkilatların üzvlərinə da verilə bilər. Mükafata namizədlər kifayət qədər idi. Hesab edirəm ki, mükafat öz layiqli namizədini tapdı”.
Daha sonra tədbirdə Milli Şuranın sədri Cəmil Həsənli, Milli Strateji Düşüncə Mərkəzinin sədri İsa Qəmbər, Müsavat başqanı Arif Hacılı, vəkil Xalid Bağırov, “Yeni Müsavat” qəzetinin köşə yazarı Zamin Hacı və mərhum jurnalistin bacısı Nigar Yaqublu çıxış ediblər.
Nigar Yaqublu deyib: “Bu gün yanımızda atam və Nərgiz yoxdur. Biz onun ölümündən sonra gördük ki, Nərgiz bu xalqın qızı imiş. Tədbirdə əməyi keçən hər kəsə təşəkkürümü bildirirəm”.
“Nərgiz” Mükafatına demokratiya və insan haqları sahəsində aktiv fəaliyyətinə görə gənc fəal İlkin Rüstəmzadə layiq görülüb. Hazırda İlkin həbsdə olduğu üçün mükafat onun atası Bakir Rüstəmzadəyə təqdim edilib.
Tədbirin dekabrın 28-də keçirilməsi Nərgiz Yaqublunun doğum günü ilə bağlıdır. Nərgiz yaşasaydı, bu gün 26 yaşı olacaqdı.
Nərgiz Yaqublu Müsavat başqanının müavini Tofiq Yaqublunun qızıdır. Nərgiz Yaqublu 2015-ci ilin aprel ayında vəfat edib. Tofiq Yaqublu 2013-cü ilin fevralından həbsdədir.
