Bakıda “Baytarlıq şəhərciyi” açılıb
Dekabrın 28-də prezident İlham Əliyev Kənd Təsərrüfatı Nazirliyinin Bakıda “Baytarlıq şəhərciyi”nin açılışında iştirak edib.
AZƏRTAC xəbər verir ki, “Baytarlıq şəhərciyi”ndə Kənd Təsərrüfatı Nazirliyi yanında Dövlət Baytarlıq Nəzarəti Xidmətinin, Respublika Baytarlıq Laboratoriyasının və Baytarlıq Elmi-Tədqiqat İnstitutunun yeni inzibati binaları yerləşir. Layihənin həyata keçirilməsində məqsəd baytarlıq xidməti işinin yaxşılaşdırılması, bu sahədə fəaliyyət göstərən qurumların maddi-texniki bazalarının möhkəmləndirilməsi, onların avadanlıq və baytarlıq preparatları ilə təminatına şərait yaradılmasından ibarətdir.
Dövlət Baytarlıq Nəzarəti Xidmətinin yeni inzibati binasında Epizootiya, Zoonoz, Brusellyoz və Vərəm Əleyhinə Respublika ekspedisiyaları da yerləşir.
Respublika Baytarlıq Laboratoriyasının inzibati binası 1974-cü ildə inşa edilib, binada əsaslı yenidənqurma işlərinə ötən il başlanıb. Burada Respublika Baytarlıq Laboratoriyasının aparatı və laboratoriyanın şöbələri yerləşir. Şöbələrin hamısı müasir laborator avadanlıqla təchiz edilib.
Baytarlıq Elmi Tədqiqat İnstitutunun yeni inzibati binasının inşasına da ötən il başlanıb. Bu institut Nazirlər Kabinetinin 2015-ci ildə qəbul etdiyi qərara əsasən Azərbaycan Dövlət Baytarlıq Preparatlarına Elmi Nəzarət İnstitutu və Azərbaycan Elmi Tədqiqat Baytarlıq İnstitutunun bazasında yaradılıb.
