Xaricdən maliyyələşən KİV haqda yeni qanun
Rusiya Dövlət Duması dekabrın 23-də KİV-in xaricdən maliyyələşməsi ilə bağlı qanun qəbul edib.
Novator.az xəbər verir ki, yeni qanun KİV-in üzərinə xarici maliyyə dəstəyi barədə dövləti məlumatlandırmaq öhdəliyi qoyur. Tələbi yerinə yetirməyən KİV-i cərimə gözləyir.
Sənədə əsasən, xarici dövlətdən, beynəlxalq təşkilatdan maliyyələşən redaksiya və ya naşir rübdə bir dəfə, ayın 10-dan gec olmayaraq Rabitə, İnformasiya Texnologiyaları və Kütləvi Kommunikasiyalara Federal Nəzarət Xidmətinə maliyyə məlumatı verməlidir.
Bu qayda KİV-in reklamdan və öz məhsulunun satışından əldə etdiyi vəsaitə şamil olunmur. Amma xaricdən olan istənilən məbləğdə maliyyələşmə barədə Nəzarət Xidməti məlumatlandırılmalıdır. Xidmət isə KİV-dən aldığı həmin informasiyanı öz saytında yerləşdirməldir.
Xarici maliyyələşmə haqda vaxtında və ya ümumiyyətlə informasiya təqdim etməyən KİV-in vəzifəli şəxsləri 30-50 min rubl, KİV-in özü isə xaricdən alınan maliyyənin bir və ya iki mislində cərimələnəcək. Qanunu təkrar pozanları daha böyük cərimələr gözləyir.
