Azərbaycanlılar İsveçdə partiya nümayəndələri ilə görüşlər keçiriblər
İsveç Azərbaycanlıları Konqresinin sədri Emil Mirzəyev İsveçdə hakim Sosial Demokratlar, həmçinin Stokholm bələdiyyəsində çoxluq təşkil edən müxalif Moderatorlar partiyalarının təmsilçiləri ilə bir sıra görüşlər keçirib. Məlumat Novator.az-a Diasporla İş üzrə Dövlət Komitəsindən verilib.
Məlumata görə, görüşlərdə son illər ərzində İsveç hökuməti və parlamenti ilə Azərbaycan diasporunun qarşılıqlı fəaliyyəti müzakirə olunub.
Müzakirələr zamanı İsveç Azərbaycanlıları Konqresinin sədri və üzvləri İsveç tərəfinin nümayəndələrini Ermənistan-Azərbaycan münaqişəsi ilə bağlı məlumatlandırıblar. Diaspor nümayəndələri Ermənistanın Azərbaycan ərazisinin 20 faizini işğal etməsi və bu ölkənin BMT-nin Azərbaycan torpaqlarının boşaldılmasına dair qətnamələrinə əməl etməməsi faktını diqqətə çatdırıblar. Münaqişə ilə bağlı sənədlər və ədəbiyyat isveçlilərə təqdim olunub.
Görüşdə Azərbaycan diasporunun İsveçin siyasi həyatında aktiv iştirakından söz açan konqres nümayəndələri son üç il ərzində təşkilatın səkkiz üzvünün İsveç Krallığının aparıcı partiyalarına üzv olduğunu vurğulayıblar. Bildirilib ki, 2010-cu ildə yaradılan İsveç Azərbaycanlıları Konqresinin əsas məqsədlərindən biri məhz soydaşlarımızın İsveçin ictimai-siyasi həyatına uğurlu inteqrasiyasını təmin etməkdir.
