“Qarabağ faciəsi” filmi erməniləri hiddətləndirib
Benilüks Azərbaycanlılar Konqresinin (BAK) dəstəyilə Niderland Krallığının dövlət televiziyası olan Ned2 kanalında “Qarabağ faciəsi” adlı sənədli film nümayiş etdirilib. Filmdə Ermənistan-Azərbaycan münaqişəsinin əsl mahiyyəti, Azərbaycan ərazisinin 20 faizdən çox hissəsinin işğal edilməsi, Ermənistandan və Dağlıq Qarabağdan qovulmuş azərbaycanlıların vəziyyəti diqqətə çatdırılıb.
Diasporla İş üzrə Dövlət Komitəsindən Novator.az-a verilən məlumata görə, filmin nümayişindən sonra Niderlandda, ümumiyyətlə Avropada yaşayan ermənilər, ermənipərəst qüvvələr yerli qəzetlərdə və internet portallarında etiraz bəyanatları yayıblar. Onlar filmdə ermənilərə vaxt ayrılmaması, münaqişəyə birtərəfli yanaşılması kimi ittihamlarla dolu yazı və statuslarla çıxış ediblər, filmin çəkiliş qrupu haqqında sərt mesajlar yaymaqdan belə çəkinməyiblər.
Artıq üçüncü dəfədir ki, BAK-ın dəstəyilə Niderland Krallığının Ned2 və Ned3 telekanallarında Xocalı soyqırımı, həmçinin Dağlıq Qarabağ həqiqətlərindən bəhs edən film nümayiş etdirilir. Bir müddət əvvəl BAK-ın dəstəyi və türkoloq Aleskandr de Grootun iştirakı ilə hazırlanmış Xocalı soyqırımına dair sənədli film ermənilərin iç üzünü açaraq yerli tamaşaçılarda dərin izlər buraxmışdı.
