Qazaxıstan Azərbaycanda qanuna edilmiş əlavəni araşdırır
Qazaxıstanın Mədəniyyət və İdman Nazirliyinin Dini İşlər Komitəsi terror fəaliyyətində iştirak edən şəxslərin vətəndaşlıqdan məhrum olunması barədə Azərbaycanda qanuna edilən əlavəni araşdırır. Novator.az xəbər verir ki, bunu komitənin sədri Qalım Şoykin dekabrın 10-da jurnalistlərə deyib.
Sözügedən əlavə Azərbaycan qanunvericiliyinə dekabrın 4-də edilib. “Azərbaycan Respublikasının vətəndaşlığı haqqında” qanunun 18-ci maddəsinə iki yeni bənd (3-1-ci və 3-2-ci bəndlər) əlavə olunub. Yeniliyə əsasən, vətəndaşın terror fəaliyyətində iştirakı və ya Azərbaycan Respublikasının konstitusiya quruluşunun zorla dəyişdirilməsinə yönələn hərəkətləri həyata keçirməsi; dini ekstremist fəaliyyətdə iştirakı, o cümlədən dini düşmənçilik zəminində dini məzhəblərin yayılması və ya dini ayinlərin icrası adı altında xarici dövlətdə silahlı münaqişədə iştirak etməsi və ya həmin münaqişəyə digər şəxsi cəlb etməsi, yaxud bu məqsədlə sabit qrup yaratması, habelə Azərbaycan Respublikası vətəndaşının dini təhsil adı altında xarici dövlətdə hərbi təlim keçməsi Azərbaycan vətəndaşlığının itirilməsi ilə nəticələnir.
Qazaxıstan Mədəniyyət və İdman Nazirliyinin Dini İşlər Komitəsinin sədri Qalım Şoykin bildirib ki, onlar hazırda ekstremizmlə mübarizə qanunvericiliyi üzrə beynəlxalq təcrübəni öyrənirlər: “Hazırda biz vətəndaşlıqdan məhrum etmə təcrübəsini müzakirə edirik. Bu günlərdə Azərbaycan terrorçuluq məqsədi ilə xaricə gedənlərin vətəndaşlıqdan məhrum olunması haqda qanuna əlavə edib”.
Şoykin Azərbaycanın bu təcrübəsinin müzakirə olunduğunu, amma hələlik bir qərara gəlmədiklərini vurğulayıb. O qeyd edib ki, vətəndaşlıqdan məhrum etmə üsulu terrorçuluqla məşğul olanları ekstradisiya etməyə və cəzalandırmağa imkan vermir: “Başqa təkliflər də var: pasportdan məhrum etmək. Yəni terrorçuluğa qoşulanları vətəndaşlıqdan məhrum etmədən onların hərəkətini məhdudlaşdırmaq üçün pasportlarını əlindən almaq olar”.
