Fuad Qəhrəmanlı həbs edilib
AXCP sədrinin müavini, müxalif Milli Şuranın üzvü Fuad Qəhrəmanlı həbs edilib. Dekabrın 8-i saat 23 radələrində Nəsimi Rayon Məhkəməsi onun barəsində üç aylıq həbs qətimkan tədbiri seçib.
“Azadlıq” qəzetinə danışan vəkil Fəxrəddin Mehdiyev bildirib ki, Baş Prokurorluğun Ağır Cinayətlərə Dair İşlər üzrə İstintaq İdarəsi Fuad Qəhrəmanlını dövlət hakimiyyəti əleyhinə çağırışlarda, zor tətbiq etmə hədəsi ilə milli, irqi, sosial, dini nifrət və ya düşmənçiliyin salınmasında təqsirli bilir. Vəkilin sözlərinə görə, ittihamlar Fuad Qəhrəmanlının “Facebook” sosial şəbəkəsində paylaşdığı fikirləri ilə bağlıdır.
Dekabrın 8-i günorta Fuad Qəhrəmanlı telefonla Baş Prokurorluğun Ağır Cinayətlərə Dair İşlər üzrə İstintaq İdarəsinə çağırılıb. O, hansı statusla çağırıldığı ilə maraqlanıb, həmçinin rəsmi şəkildə çağırış istəyib. Bundan az sonra polislər AXCP sədrinin müavinini evdən məcburi şəkildə prokurorluğa aparıblar.
Gecə saatlarında prokurorluq əməkdaşları Fuad Qəhrəmanlının Mehdiabad qəsəbəsindəki evində axtarış apararaq 1 kompüteri götürüblər.
Transparency.az bildirir ki, Fuad Qəhrəmanlı 1975-ci ildə Şahbuz rayonunda doğulub. Dövlət İdarəçilik Akademiyasını politoloq ixtisası üzrə bitirib.
1990-cı ildən Azərbaycan Xalq Cəbhəsinin üzvüdür. 1994-1997-ci illərdə “Avrasiya”, “Azadlıq”, “Yeni Müsavat” qəzetlərində çalışıb. 1998-ci ildə “Müxalifətin mitinq taktikası” adlı çap olunmamış məqaləyə görə xüsusilə ağır dövləti cinayətdə ittiham olunaraq 1 il 6 ay müddətinə azadlıqdan məhrum edilib. 1 il 2 aylıq həbsdən sonra azadlığa buraxılıb.
2000-ci ildə AXCP Analitik Mərkəzinin rəhbəri təyin edilib. Həmin il partiya Ali Məclisinin üzvü seçilib. 2003-cü ildən AXCP Ali Məclisi Rəyasət Heyətinin üzvü, 2009-cu ildən AXCP sədrinin müavinidir.
Fuad Qəhrəmanlı 2011-ci ildə müxalif İctimai Palatanın razılaşdırılmamış 2 aprel mitinqinə görə 2 il müddətinə şərti azadlıqdan məhrum edilib.
