Avropa azərbaycanlıları Avropa Parlamentinə müraciət edib
Avropa Azərbaycanlıları Konqresi (AAK) 10 Dekabr Beynəlxalq İnsan Hüquqları Günü ilə əlaqədar Avropa Parlamentinin insan hüquqları komissiyasına müraciət ünvanlayıb.
Diasporla İş üzrə Dövlət Komitəsindən Novator.az-a verilən məlumata görə, konqres dünya ictimaiyyətini beynəlxalq hüquq normaları çərçivəsində və ikili standartlara yol vermədən Ermənistanın işğal siyasətinə münasibət bildirməyə, insanların pozulmuş hüquqlarının müdafiəsi və bərpası üçün birlik və obyektiv mövqe nümayiş etdirməyə çağırıb.
Müraciətdə Qarabağdan didərgin düşmüş insanların taleyi və vətəndə yaşamaq hüququndan məhrum olmuş ailələrin aqibəti barədə məlumat verilir, Ermənistanın Azərbaycanın 20 faiz torpağını işğal etməsi, BMT-nin Azərbaycan torpaqlarının azad edilməsinə dair qəbul etdiyi qətnamələr xatırladılır. Avropa Azərbaycanlıları Konqresi Beynəlxalq İnsan Hüquqları Günündə Avropa ictimaiyyətini köçkün düşmüş yüz minlərlə azərbaycanlının hüququnun pozulmasına biganə qalmamağa çağırır.
Müraciətdə Azərbaycanın tərkib hissəsi olan Dağlıq Qarabağın erməni işğalından azad edilməsi və bu torpaqlardan köçkün düşən insanların doğma torpaqlarına qaytarılması tələb edilir.
BMT Baş Assambleyasının qətnaməsinə əsasən, 1950-ci ildən başlayaraq hər il dekabrın 10-u İnsan Hüquqları Günü kimi qeyd edilir.
