Yaponiyada anti-haker peşəsi yaradılır
Yaponiyada “informasiya təhlükəsizliyinin təminatı üzrə mütəxəssis” peşəsi yaranacaq. Novator.az xəbər verir ki, bunu jurnalistlərə Yaponiya hökumətinin baş katibi Yoşihide Suqa deyib.
O bildirib ki, bu peşə rəsmən 2017-ci ildə təsis olunacaq. 2020-ci ilədək yeni peşə üzrə lisenziya alanların sayı 30 min nəfərə çatdırılacaq.
Yoşihide Suqa tez bir zamanda yeni peşəni tənzimləyən qanunvericilik bazasının hazırlanmasının da vacib olduğunu vurğulayıb.
Bu ilin sentyabrında Yaponiya hökuməti 2020-ci ildə Tokioda keçiriləcək Olimpiya Oyunları ərəfəsində kiber təhlükəsizliyin gücləndirilməsi üçün yeni strategiyanı təsdiqləyib. Yeni strategiyanın məqsədi kiber cinayətkarlara qarşı müdafiə sistemini təkmilləşdirməkdir.
2020-ci il olimpiadasınadək kiber təhlükəsizliyi gücləndirmək ideyası Yaponiyada 2015-ci ilin iyun ayında pensiya fonduna irimiqyaslı hücumdan sonra ortaya çıxıb. Həmin hücum nəticəsində 1 milyon 250 min adamın bank hesablarına aid məlumatlar da daxil olmaqla bir sıra informasiyalar hakerlərin əlinə keçmişdi.
Yeni strategiya mühüm informasiyaların yer aldığı dövlət institutları və şöbələrinin internet şəbəkəsindən ayrılmasını da nəzərdə tutur.
