Yanukoviç: “Siyasətə qayıtmaq istəyirəm”
Ukraynanın sabiq prezidenti Viktor Yanukoviç Rusiyanın RİA Novosti agentliyinə müsahibə verib. Novator.az-ın məlumatına görə, Yanukoviç siyasətə qayıtmaq planı olduğunu vurğulayıb: “Siyasətə qayıtmaq istəyirəm. Bu gün əlimdən gələni əsirgəmir, Ukraynada təhdid olunan, Rusiyada və başqa ölkələrdə məskunlaşan bir çox adama kömək edirəm. Əlbəttə, Rusiyada onlarla əlaqə saxlayır, bacardığım qədər yardım göstərirəm”.
Yanukoviç Ukraynanın bəzi siyasətçiləri ilə də əlaqə saxladığını bildirib: “Onların əksəriyyəti bir il bundan əvvəlki kimi utanmır və qorxmur, görüşlərimiz, müzakirələrimiz zamanı özlərini rahat hiss edirlər”.
Yanukoviç 1950-ci ildə anadan olub. Donetsk Politexnik İnstitutunu və Ukrayna Xarici Ticarət Akademiyasını bitirib. 1997-2002-ci illərdə Donetsk Vilayəti Dövlət Administrasiyasının sədri olub. 2002-ci ildə Ukraynanın baş naziri təyin edilib. 2003-cü ildən Regionlar Partiyasının sədri olub, iki dəfə baş nazir postunu tutub. 2010-cu ilin fevral ayında prezident seçilib.
2014-cü il fevralın 22-də parlament Yanukoviçi prezident postundan uzaqlaşdırıb və o, ölkədən qaçaraq Rusiyaya sığınıb.
Ukraynada Yanukoviç sabiq prezident statusundan məhrum edilib və onun haqqında cinayət işləri qaldırılıb.
