Xəzərdə 26 nəfərin axtarışı davam edir
Neft daşları” və “Günəşli” sahəsində itkin düşmüş 26 nəfərin axtarışları bütün gecə davam edib. AZƏRTAC xəbər verir ki, dekabrın 8-i saat 11-də keçirilən mətbuat konfransında “Azneft” İstehsalat Birliyinin baş mühəndisi Balamirzə Ağarəhimov belə deyib. Onun sözlərinə görə, “Günəşli” sahəsində axtarışlara Dövlət Sərhəd Xidmətinin 2 helikopteri və 5 gəmisi ilə yanaşı Fövqəladə Hallar Nazirliyinin 4 helikopteri də cəlb olunub: “Neft daşları”nda itkin düşən 3 işçinin axtarışları isə helikopterlər, gəmilər və 2 dalğıc qrupu vasitəsilə həyata keçirilir. Bundan başqa xüsusi avadanlıqlarla təchiz olunan “Elgiz” gəmisi ilə suyun altında axtarışlar aparılıb. Bütün bunlara baxmayaraq axtarışlar nəticə verməyib”.
“Azneft” rəsmisi “Günəşli” yatağının 10 saylı dərin dəniz özülündə yanğının söndürülməsi istiqamətində işlərin davam etdirildiyini vurğulayıb.
Dekabrın 4-də 10 saylı dərin dəniz özülündə sualtı qaz xəttinin dayaq borusu qırılıb, nəticədə boru kəməri zədələnib və şiddətli yanğın baş verib. 63 işçidən 33-ü xilas olunub, 7 nəfərin meyiti tapılıb.
Həmin gün “Neft daşları”ndakı 501 nömrəli özüldə də faciə baş verib. Güclü tufan nəticəsində dalğalar estakada döşəməsini üstündəki yaşayış köşkü ilə birlikdə dənizə atıb. Köşkdəki 3 nəfər itkin düşüb.
