Rusiya Ermənistandakı hərbi bazasını vertolyotlarla gücləndirir
Rusiya Silahlı Qüvvələrinin Cənub Hərbi Dairəsi dekabrın 8-də Ermənistandakı Erebuni rus hərbi bazasına 7 ədəd “Mi-24P” zərbə və “Mi-8MT”nəqliyyat vertolyotlarının gətirildiyi haqda məlumat yayıb.
Novator.az xəbər verir ki, məlumatda ilin sonuna daha bir vertolyot dəstinin göndəriləcəyi vurğulanır. Vertolyotlar Rusiya Aviasiya Birləşməsinin “MiQ-29”qırıcı təyyarələrinin yanındakı uyğun dayanacaqlarda yerləşdirilib. Aviasiya vasitələri ay ərzində toplanacaq və pilotlar planlı uçuşlar keçirməyə başlayacaq.
Rusiya Müdafiə Nazirliyinin məlumatına görə, Cənub Hərbi Dairəsinin Yerevandakı aviasiya bazası 1995-ci ildə formalaşdırılıb. 1998-ci ildə bazaya Rusiyadan gətirilmiş “MiQ-29”qırıcı təyyarələri yerləşdirilib. 2001-ci ilin iyulunda Erebunidə yerləşən hissələrdən aviasiya bazası yaradılıb. Həmin aviasiya bazası Gümrüdə yerləşən 102-ci hərbi bazanın hava komponentidir.
