Müdafiə naziri: “Ermənistan rəhbərliyi cəbhədə təxribatlara cəhd göstərir”
“Ermənistanın hərbi-siyasi rəhbərliyi regiondakı mürəkkəb vəziyyətdən öz xeyrinə istifadə etmək niyyətilə son bir neçə gündə cəbhəboyu zonada gərginlik yaratmağa, təxribatlar həyata keçirməyə cəhd göstərir”. Azərbaycanın müdafiə naziri general-polkovnik Zakir Həsənov dekabrın 8-də Fransanın ölkəmizdə yeni təyin olunmuş fövqəladə və səlahiyyətli səfiri Orelia Buşezi qəbul edərkən belə deyib.
Nazir vurğulayıb: “Azərbaycan əsgərinin vurduğu zərbələrdən qarşı tərəf xeyli itkilər verib, ancaq onlar bunu gizlətməyə çalışır. Erməni xalqı sadəcə olaraq Yerevan rəhbərliyinin girovuna çevrilib”.
Müdafiə Nazirliyi mətbuat xidmətinin məlumatına görə, nazir bildirib ki, uzun illərdir beynəlxalq qurumların fəaliyyətinə baxmayaraq davam edən Ermənistan-Azərbaycan münaqişəsi regional sabitliyə əsas təhlükə mənbəyidir.
