Əlilliyi olan şəxslərin sərgi-müsabiqəsinin qaliblərinə mükafatlar təqdim olunub
Noyabrın 26-da Əmək və Əhalinin Sosial Müdafiəsi Nazirliyi əlilliyi olan şəxslərin Bakıda keçirilən IX ümumrespublika yaradıcılıq sərgi-müsabiqəsinin qaliblərini mükafatlandırıb. Rəsmi məlumata görə, rəngkarlıq və qrafika, dekorativ tətbiqi sənət, tikmə və xalçaçılıq üzrə I yer tutan 3 nəfərin hər birinə 300 manat, II yer tutan 7 nəfərin hər birinə 250 manat, III yer tutan 11 nəfərin hər birinə 200 manat pul mükafatı və diplomlar təqdim olunub.
Həmçinin sağlamlıq imkanları məhdud 18 yaşadək uşaqlar arasında təsviri sənət üzrə I yeri tutan 1 nəfərə 200 manat, II yeri tutan 3 nəfərin hər birinə 150 manat, III yeri tutan 5 nəfərin hər birinə isə 100 manat pul mükafatı və diplomlar verilib. Sərgi-müsabiqənin digər iştirakçıları maddi yardım və təşəkkürnamələrlə təmin olunublar.
