Nardaranda qanlı qarşıdurma
Nardaran, 25.11. 2015
Noyabrın 26-sı günorta saatlarında Bakının Sabunçu rayonunun Nardaran qəsəbəsində polislə dindarlar arasında qarşıdurma olub.
İslamazeri.az saytı bildirir ki, polislər “Rəhimə xanım” ziyarətgahı yanında yerləşən Hüseyniyyədə namaz vaxtı əməliyyat keçiriblər. Bu vaxt atışma düşüb.
İlahiyyatçı Tale Bağırov və bir neçə dindar tutulub. Onların hara aparıldığı hələ bilinmir.
Nardaran, 25.11. 2015
Trend-in məlumatına görə, qəsəbədə baş vermiş insident nəticəsində 4 nəfər ölüb. Onlardan neçəsinin polis, neçəsinin mülki şəxs olduğu hələ bəlli deyil. Ancaq məlumatlara görə, hər iki tərəfdən itki var.
3 saylı Şəhər Klinik Xəstəxanasının baş həkimi Fikrət Zeynalov Trend-ə deyib ki, Nardarandakı hadisələr nəticəsində yaralanan 3 nəfər xəstəxanaya daxil olub. Onların hər üçü kişidir. Xəstələrin vəziyyəti kafi qiymətləndirilir.
APA xəbər verir ki, Nardaranda keçirilən əməliyyat zamanı hüquq mühafizə orqanları əməkdaşları müqavimətlə qarşılaşıblar. Nəticədə atışma olub. Əməliyyat zamanı bir neçə nəfər saxlanılıb.
Nardaran, 25.11. 2015
Modern.az-a verilən məlumata görə, əməliyyatda məqsəd ilahiyyatçı Tale Bağırzadəni həbs etmək olub. Məlumata görə, polis onu axtarırmış, yeri müəyyən olunduğundan belə bir əməliyyata başlanıb.
Musavat.com hadisə nəticəsində 8 nəfərin yaralandığını xəbər verir.
Tale Bağırzadənin Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə aparıldığı deyilir.
Tale Bağırzadədən başqa ilahiyyatçı Zülfüqar Mikayılzadənin həbs olunduğu haqda xəbərlər yayılıb.
