Qarabağ müharibəsi əlilləri və şəhid ailəsinə ev verilib
Əmək və Əhalinin Sosial Müdafiəsi Nazirliyinin noyabrın 25-də yayılan rəsmi məlumatına görə, fərdi yaşayış evlərinin müharibə əlilləri və şəhid ailələrinin istifadəsinə verilməsi işləri davam etdirilir. Daha 6 yeni fərdi yaşayış evi Quba rayonunda bu təbəqədən olan insanlara verilib. Onlardan 5-i Qarabağ müharibəsi əlilləri, 1-i isə şəhid ailəsidir.
Bu il Əmək və Əhalinin Sosial Müdafiəsi Nazirliyi Tərtər rayonunda 54 mənzilli yaşayış evi, ayrı-ayrı rayonlarda (Qusar, Ağcabədi, Ağdam, Yevlax, Bərdə, Zərdab, Goranboy, Quba) ümumilikdə 62 fərdi yaşayış evini müharibə əlilləri və şəhid ailələrinin istifadəsinə verib. Həmçinin Bakı, Gəncə, Mingəçevir şəhərlərində hazır yaşayış binalarından alınaraq təmir etdirilmiş 56 mənzil bu təbəqələrdən olanlara təqdim olunub. Beləliklə, 172 nəfər müharibə əlili və şəhid ailəsi mənzillə təmin edilib.
