Putin vurulan pilotlara mükafat verdi
Noyabrın 25-də Rusiya prezidenti Vladimir Putin Türkiyənin hava məkanını pozduğuna görə vurulan Su-24 təyyarəsi və Mi-8 axtarış helikopterinin pilotlarının mükafatlandırılması haqda fərman imzalayıb.
Noyabrın 24-də Türkiyə Hava Qüvvələrinə məxsus F-16 təyyarəsi Rusiyaya məxsus Su-24 qırıcı təyyarəsini vurub. Rusiyaya məxsus qırıcı təyyarə Türkiyə-Suriya sərhədi yaxınlığında yerə düşüb. Rusiya tərəfi Su-24-ün Türkiyənin hava məkanını pozmadığını və Suriya ərazisində vurulduğunu iddia edir. Rusiyanın Müdafiə Nazirliyi bəyan edir ki, təyyarə 6 min metr yüksəklikdə uçub, Suriya səmasında olub. Ancaq Türkiyə mənbələri Su-24-ün türk sərhədini pozduğu üçün vurulduğunu qeyd edir. Türkiyə bəyan edir ki, Su-24-ə Türkiyə Hava Qüvvələrinə məxsus F-16-dan atəş açılıb, qırıcı Suriya sərhədi yaxınlığında düşüb. Türkiyə mənbələri onu da bildirir ki, qırıcının hər iki pilotu paraşütlə enməyə imkan tapıb, onlardan biri yerli türkmən qüvvələrin əlinə keçib.
Rusiya mənbələrinin iddiasına görə, Su-24 təyyarəsinin pilotlarının axtarışında Rusiyaya məxsus iki Mi-8 helikopteri iştirak edib. Türkiyə Silahlı Qüvvələri bu helikopterlərdən birini vurub. Rusiyaya məxsus Mi-8 helikopteri Latakiya əyalətində təcili eniş edib və atəş nəticəsində piyada dənizçi həlak olub.
Novator.az xəbər verir ki, Putin Su-24 qırıcı təyyarəsinin heyət üzvü polkovnik-leytenant Oleq Peşkova Rusiya Federasiyasının Qəhrəmanı adını verib. Rusiya prezidenti Mi-8 helikopterinin kapitanı Konstantin Muraxtini və matrosu Aleksandr Pozıniçi “İgidliyə görə” ordeni ilə təltif edib.
