Deputat seçilmiş 4 rektor vəzifədən getdi
Prezident İlham Əliyev sərəncamlar imzalayaraq Ağacan Abiyevi Azərbaycan Dövlət Bədən Tərbiyəsi və İdman Akademiyasının, Səməd Seyidovu Azərbaycan Dillər Universitetinin, Aqiyə Naxçıvanlını Azərbaycan Müəllimlər İnstitutunun, Əhliman Əmiraslanovu Azərbaycan Tibb Universitetinin rektoru vəzifələrindən azad edib. Onlar noyabrın 1-də Milli Məclisin deputatı seçiliblər.
Azərbaycan Konstitusiyasına görə, icra və ya məhkəmə hakimiyyətində qulluq edən, elmi, pedaqoji və yaradıcılıq fəaliyyəti çıxılmaqla başqa ödənişli fəaliyyətlə məşğul olan şəxslər Milli Məclisin deputatı ola bilməz. Deputat seçilmiş şəxs ən geci 60 gün müddətində deputat statusu ilə bir araya sığmayan vəzifədən azad olunduğu barədə əmrin surətini (bu vəzifələrdən azad olunmaq barədə 3 gün müddətində ərizə verəcəklərini təsdiq edən sənədin surətini) və ya fəaliyyətlərinə xitam verilməsi barədə öhdəliyi nəzərdə tutan ərizəni Mərkəzi Seçki Komissiyasına təqdim etməlidir.
