Milli Məclisin ilk iclası bu gün keçiriləcək
Noyabrın 24-də yeni Milli Məclisin (Parlamentin yeni deputatlarının siyahısı) ilk iclası keçiriləcək. İclasda parlament sədri və sədrin müavinlərinin, komitə sədrləri, sədr müavinlərinin seçilməsi nəzərdə tutulub.
Transparency.az bildirir ki, 1 noyabr parlament seçkisinin nəticələrini Konstitusiya Məhkəməsi bu gün təsdiqləyib. Milli Məclisə seçki 125 seçki dairəsi üzrə keçirilib. Seçkinin nəticələrinə görə, Milli Məclisə 124 nəfər seçilib: YAP-dan 71 nəfər, 11 partiyadan 12 nəfər, partiyasız şəxslərdən 41 nəfər. 1 dairə üzrə seçkinin nəticələri ləğv olunub. 90 saylı Ağdaş seçki dairəsi üzrə şikayətlərə baxan MSK belə qərar verib.
Səlahiyyəti bu gün başa çatan köhnə parlamentin bütün rəhbərliyi yeni Milli Məclisdə təmsil olunur. Spiker Oqtay Əsədov (YAP) 45 saylı Abşeron, onun birinci müavini Ziyafət Əsgərov (YAP) 76 saylı Lənkəran-Astara, müavinləri Bahar Muradova (YAP) 84 saylı Füzuli, Valeh Ələsgərov (partiyasız) 102 saylı Samux-Şəmkir dairəsindən deputat seçiliblər.
