Əlilliyi olan şəxslərin yaradıcılıq sərgi-müsabiqəsi keçirilir
Noyabrın 24-ü Bakıda əlilliyi olan şəxslərin IX ümumrespublika yaradıcılıq sərgi-müsabiqəsi başlayıb. Sərgini Əmək və Əhalinin Sosial Müdafiəsi Nazirliyi təşkil edib.
Nazirlikdən Transparency.az-a verilən məlumata görə, sərgi-müsabiqədə 221 nəfər əlilliyi olan şəxsin və sağlamlıq imkanları məhdud 18 yaşadək uşağın rəsm, xalçaçılıq, bədii tikmə, toxuma və hörmə, dulusçuluq, keramika, ağac üzərində oyma və metal üzərində işləmə, bədii tikmə və s. növlərdə 762 əl işi nümayiş olunur.
Sərgi-müsabiqə noyabrın 26-dək davam edəcək. Tədbirin yekununda müvafiq nominasiyalar üzrə yer tutan müəlliflərə diplom və mükafatlar təqdim olunacaq. Sərgi-müsabiqənin digər iştirakçılarına, açılış mərasimində iştirak edən müəlliflərin hər birinə də maddi yardım və təşəkkürnamələr veriləcək.
