Tbilisdə Axundov Muzeyinə mükafat verilib
Gürcüstanda fəaliyyət göstərən Mirzə Fətəli Axundov adına Azərbaycan Mədəniyyəti Muzeyi və Mədəniyyət Mərkəzi mükafata layiq görülüb.
Diasporla İş Üzrə Dövlət Komitəsindən Novator.az-a verilən məlumata görə, Gürcüstan xalq müdafiəçisi yanında fəaliyyət göstərən Milli Azlıqlar Şurası təşkilatın fəaliyyətini yüksək qiymətləndirərək Gürcüstanda tolerantlıq mədəniyyətinin inkişafına verdiyi töhfələrə görə onu “Tolerantlğı dəstəkləyən təşkilat” mükafatı ilə təltif edib.
Mükafat BMT Baş Assambleyasının təşəbbüsü ilə UNESCO tolerantlıq prinsipləri haqqında bəyannaməyə əsasən qeyd edilən Beynəlxalq Tolerantlıq Günü münasibətilə keçirilmiş tədbirdə muzeyin direktoru Leyla Əliyevaya təqdim olunub.
M.F.Axundovun Tbilisidə 44 il yaşadığı bina 1982-ci ildən muzeyə çevrilib və sonradan M.F.Axundov adına Azərbaycan Mədəniyyəti Muzeyi statusu alıb. Hazırda muzeyin nəzdində mədəniyyət mərkəzi də fəaliyyət göstərir. Mərkəzdə xalçaçılıq, musiqi, muğam, rəsm və dil kursları mövcuddur.
Muzeyin əsas fəaliyyət istiqamətləri Azərbaycan mədəniyyətini, xalqımızın mədəni irsini Gürcüstanda qoruyub saxlamaq, təmsil və təbliğ etməkdir.
