Niderlandda Qarabağ haqda film nümayiş etdirilib
Niderland Krallığının dövlət televiziyasında – “Ned2” kanalında “Qarabağ faicəsi” adlı sənədli film nümayiş etdirilib.
Diasporla İş üzrə Dövlət Komitəsindən Novator.az-a verilən məlumata görə, filmi mərkəzi ofisi Belçika paytaxtı Brüsseldə yerləşən “A.R.D.A Production” şirkəti hazırlayıb.
Şirkətin rəhbəri Fikrət Aydemir bildirib ki, Avropanın son illərin ən böyük köç dalğasının qarşısında çaşqın vəziyyətdə qaldığı, qaçqınların Avropa şəhərlərindəki parklarda məskən saldığı bir vaxtda Dağlıq Qarabağ problemi və Azərbaycanın yaşadığı qaçqın problemi gündəmə gətirilir.
“Qarabağ faciəsi”nin yaradıcı heyəti 30 dəqiqəlik sənədli filmdə Dağlıq Qarabağda baş verənləri əvvəldən axıradək göstərməyə çalışıb. Filmdə 25 ildir Dağlıq Qarabağın problemli bölgə olaraq qaldığı, Ermənistanın ərazi iddialarından sonra münaqişənin Ermənistanla Azərbaycan arasında müharibəyə çevrildiyi bildirilir.
Müharibə zamanı doğma torpaqlarını tərk etməyə məcbur olan Dağlıq Qarabağın azərbaycanlı əhalisinin qırğınlara məruz qaldığı, Qarabağın isə XX əsrin ən qanlı soyqırımına şahid olduğu Niderland tamaşaçısının diqqətinə çatdırılır.
Son iki ildə Hollandiya dövlət televiziyası üçün müntəzəm olaraq sənədli filmlər hazırlayan “A.R.D.A Production”ın Dağlıq Qarabağdan bəhs edən bu filminin ərsəyə gəlməsində Diasporla İş üzrə Dövlət Komitəsi də dəstəyini göstərib.
