İnternet niyə kəsilmişdi? (Rəsmi məlumat)
Noyabrın 17-də Rabitə və Yüksək Texnologiyalar Nazirliyi rəsmi məlumat yayıb. Məlumatda deyilir: “16 noyabr 2015-ci il saat 16 radələrində Azərbaycan Respublikasının qlobal internet şəbəkəsinə əlaqəsini təmin edən milli operator – “Delta-Telekom” MMM Data Mərkəzinin əsas kabellərinin birində tüstülənmə baş verib. Hadisənin qarşısının alınması üçün təxirəsalınmaz tədbirlər görülüb, Fövqəladə Hallar Nazirliyinin yanğınsöndürmə xidməti də cəlb edilib. Açıq yanğın halı baş verməyib, kabellərin əriməsi nəticəsində yaranan tüstü avadanlıqlarda qismən nasazlıq yaradıb. Bununla əlaqədar sistemin ümumi işi dayandırılıb və internet əlaqəsində kəsinti yaranıb.
Hadisə zamanı ölkənin tranzit marşrutu üzrə fəaliyyətində heç bir dayanma baş verməyib və normal xidmət göstərilməsi təmin olunub. Həmçinin digər operatorların alternativ kanalları üzrə ölkədə internet əlaqəsi mövcud olub və bu imkanlardan rabitənin təşkili üçün istifadə edilib.
Rabitə və Yüksək Texnologiyalar Nazirliyinin, aidiyyəti digər dövlət orqanlarının nümayəndələri hadisə yerində olub. Tüstülənmənin baş verməsi və onun təxirəsalınmaz işlərinin dərhal başlamasına maneələr yaratması səbəbindən internet əlaqəsinin bərpası vaxt tələb edib, gərgin və fədakar əmək nəticəsində saat 21 radələrində internet əlaqəsi bərpa olunub.
Hazırda ölkədə internet əlaqəsi var, bank sektorunda, dövlət təşkilatlarında və digər sahələrdə internet vasitəsilə göstərilən xidmətlərin fəaliyyəti, o cümlədən fərdi istifadəçilərin istifadəsi təmin edilib. Hadisənin fəsadlarının aradan qaldırılması üzrə tamamlama işləri aparılır”.
