Putin Ermənistanla birgə müdafiə sistemi yaradılması layihəsini təsdiqlədi
Rusiya prezidenti Vladimir Putin noyabrın 11-də Ermənistanla hava hücumundan birgə müdafiə sisteminin yaradılması haqda sazişin imzalanmasına sərəncam verib.
Novator.az xəbər verir ki, Putin imzaladığı sərəncamda hökumətin Qafqaz regionunda Ermənistanla hava hücumundan birgə müdafiə sisteminin yaradılması haqda sazişin imzalanması təklifini qəbul etməyi tapşırıb.
Rusiya prezidenti Müdafiə Nazirliyinə Xarici İşlər Nazirliyi ilə birlikdə həmin sazişin imzalanması haqda razılıq əldə etmək üçün Ermənistanla danışıqlar aparmaq barədə də göstəriş verib.
MDB Müdafiə Nazirləri Şurası yanında hava hücumundan müdafiə məsələlərini əlaqələndirən komitə Qafqaz, Mərkəzi Asiya və Şərqi Avropa istiqamətlərinin hər biri üzrə kollektiv təhlükəsizlik sistemləri yaradılmasını razılaşdırıb.
MDB-yə Qazaxıstan, Azərbaycan, Ermənistan, Belarus, Qırğızıstan, Rusiya, Tacikistan, Özbəkistan, Moldova, Türkmənistan və Ukrayna daxildir.
