Lukaşenko 5-ci dəfə and içdi
Noyabrın 6-da Belarus lideri Aleksandr Lukaşenko beşinci dəfə prezident kimi and içib.
Lukaşenko bu il oktyabrın 11-də keçirilən prezident seçkisində 83,5% səs çoxluğu ilə qalib gəlib. Seçkinin rəsmi nəticələrinə görə, o, 5 milyon 102 min 478 səs alıb.
Novator.az xəbər verir ki, paytaxt Minskin Müstəqillik sarayında baş tutan andiçmə mərasimində Lukaşenko konstitusiyanın xüsusi nüsxəsinə əl basaraq Belarus dilində and içib.
Andiçmədən sonra Lukaşenko prezident səlahiyyətlərinin icrasına başlaması haqda aktı imzalayıb. Mərkəzi Seçki Komissiyasının sədri Lidiya Yermoşina prezident vəsiqəsini ona təqdim edib.
60 yaşlı Lukaşenko 1994-cü ildən prezident kürsüsünü tutur. İlk dəfə 5 il müddətinə seçilən Lukaşenko 1996-cı il referendumu ilə səlahiyyət müddətini 2001-ci ilədək uzadıb. 2001-ci ildə o, ikinci dəfə prezident kürsüsünə yiyələnib. 2004-cü il referendumunda bir nəfərin iki dəfədən çox prezident seçilməsinə qoyulmuş məhdudiyyət götürülüb, nəticədə Lukaşenko 2006 və 2010-cu illərin seçkisində də dövlət başçısı postunu əlində saxlayıb.
