Mobil qurğuların 41%-i təhlükə altındadır
Mobil qurğuların 41%-i təhlükəli virus proqramlarına yoluxma riski altındadır. Novator.az xəbər verir ki, “Skycure” informasiya təhlükəsizliyi şirkətinin 2015-ci ilin üçüncü rübünə aid hesabatında belə deyilir.
Hesabatda bildirilir ki, hər 100 mobil qurğudan 2-si haker hücumuna məruz qalır.
Tədqiqatçılar təhlükənin getdikcə artdığını vurğulayırlar. Onlar bildirirlər ki, bu ilin iyulunda mobil qurğuların 22%-i təhlükə altında idisə, indi 41%-i təhlükədədir. Səbəb isə qurğuların əksəriyyətində etibarlı müdafiənin olmamasıdır.
Hesabata görə, mobil qurğuların 52%-nə sadə parol belə quraşdırılmayıb. Qurğuların 30%-i isə əməliyyat sisteminin köhnə versiyası ilə işləyir.
Hesabat 2015-ci ilin iyul-sentyabr aylarında aparılmış təhlükəsizlik testlərinin nəticələrinə əsaslanır. Testlər həm təşkilatlara, həm də ayrı-ayrı adamlara məxsus mobil qurğularda aparılıb.
