Göyçayda insan alveri mövzusunda tədbir keçirilib
Göyçay Dövlət İdarəetmə və Texnologiya Kollecində “İnsan alverinin mahiyyəti, formaları, doğurduğu təhlükələr və onunla mübarizə” mövzusunda tədbir keçirilib.
AZƏRTAC xəbər verir ki, tədbirdə insan alverinin ümumbəşəri faciə olması ilə bağlı fikirlər səsləndirilib. Yalnız qadınlar deyil, kişilər və uşaqlar da insan alverinin qurbanı olur. Bununla mübarizə aparmaq üçün, ilk növbədə, maarifləndirmə tədbirlərini artırmaq lazımdır.
Toplantıda “İnsan alveri nədir?”, “İnsan alverçiləri insanları (qurbanlarını) hansı yollarla tora salırlar”, “İnsanları tora salmaq üçün hansı fəndlərdən istifadə edirlər?” mövzularında tədbir iştirakçılarına ətraflı məlumatlar verilib. Məruzəçilər gəncləri xarici ölkələrə səfər edərkən nələri yadda saxlamalı olduqları barədə maarifləndiriblər.
Tədbir iştirakçılarına insan alveri cinayətinin törədilmə formalarını əks etdirən bukletlər paylanılıb, DİN-in İnsan Alverinə Qarşı Mübarizə Baş İdarəsinin, qaynar xətt xidmətinin telefon nömrələri verilib.
Sonda “İnsan alverindən özünü qoru” adlı videoçarx nümayiş etdirilib.
