İşğal altındakı abidələrimizə dəymiş zərər: 177 milyard dollar
Oktyabrın 27-də Beynəlxalq Mətbuat Mərkəzində “Azərbaycanın İşğal Olunmuş Ərazilərindəki Tarix və Mədəniyyət Abidələrini Müdafiə Təşkilatı” İctimai Birliyinin “Erməni vandalizmi ilə bağlı Türkiyə və Avropa ölkələrində tədbirlərin təşkili” adlı layihəsinin son hesabatı dinlənilib.
AZƏRTAC xəbər verir ki, layihə Prezident yanında Qeyri-Hökumət Təşkilatlarına Dövlət Dəstəyi Şurasının vəsaiti hesabına həyata keçirilib.
Tədbirdə ictimai birliyin sədri Faiq İsmayılov bildirib ki, layihənin məqsədi Ermənistanın işğalı altında olan ərazilərimizdəki tarixi və mədəniyyət abidələrinin dağıdılmasının səbəblərinin indiyədək beynəlxalq elmi ictimaiyyətə məlum olmayan tərəflərini araşdırmaq və erməni vandalizmi ilə bağlı beynəlxalq səviyyədə müzakirələr təşkil etməklə dünya ictimaiyyətində bu haqda real təsəvvür yaratmaqdan ibarətdir.
Faiq İsmayılov Qarabağ münaqişəsi nəticəsində Azərbaycan ərazilərindəki tarixi və mədəniyyət abidələrinin ermənilər tərəfindən vandalizmə uğradılmasının tarixini, məsələnin həlli istiqamətində danışıqlar prosesinin gedişini və beynəlxalq birliyin bu məsələdə tutduğu mövqeyin nə dərəcədə ədalətli olduğunun araşdırılmasından söz açıb. O diqqət çatdırıb ki, ümumilikdə yüz mindən artıq maddi-mədəniyyət abidələrimiz erməni vəhşiliyinin qurbanına çevrilib. Bütün bunları nəzərə almaqla ictimai birlik tarixi və mədəniyyət abidələrimizin bərpası və geri qaytarılması istiqamətində bundan sonra da dünyanın aparıcı dövlətlərində öz təbliğat kampaniyasını davam etdirəcək.
Hesabatda ictimai birlik ölkəmizin işğal altında olan ərazilərimizdə ümumilikdə tarixi və mədəniyyət abidələrimizə dəymiş zərəri 177 milyard dollar civarında qiymətləndirib.
