Okeanın dibindən keçən internet kabelləri
Oktyabrın 26-da ABŞ mediasında belə bir xəbər yayılıb ki, Rusiyanın sualtı qayıqları və kəşfiyyat gəmiləri okeanın dibində yerləşən, bütün dünyanı internetlə təmin edən kabellərin yaxınlığında fəallaşıb. Məlumatda deyilir ki, ABŞ xüsusi xidmət orqanları Rusiyanın sualtı kabellərə qarşı aqressiv hərəkətlərə yol verəcəyindən narahatdır.
Bu xəbərdə yəqin ki, çoxları üçün iki yenilik var: biri odur ki, Rusiyanın sualtı qayıqları və kəşfiyyat gəmiləri dünyanı internetlə təmin edən kabellərin yaxınlığında fəallaşıb. İkincisi də odur ki, sən demə, okeanın dibində dünyanı internetlə təmin edən kabellər varmış.
Novator.az bildirir ki, həqiqətən də dünyanın bütün qitələrini (Antarktikadan başqa) okeanın dibində yerləşdirilmiş kabellər birləşdirir. Qlobal şəbəkəni – interneti məhz həmin kabel xətləri yaradır.
Bütün beynəlxalq rabitə trafiki, təkcə internet deyil, telefon danışıqlarının da 99%-i bu kabellərdən keçir.
Bu lifli optik kabellər dünyanın bütün okeanlarından keçir, onların ümumi uzunluğu milyonlarla kilometrdir.
İlk sualtı kabellər sadə birləşmələrdən ibarət olub. Hazırda sualtı kabellər daha mürəkkəbdir, onlar okeanın dibində bölünə və şaxələnə bilir.
