Bakıda əməliyyat: dindarlar tutulub
Oktyabrın 22-də saat 21 radələrində Bakının Yasamal rayonunda rayon prokurorluğu, MTN-in rayon idarəsi və polis idarəsinin əməkdaşları əməliyyat tədbiri keçiriblər.
Novator.az Daxili İşlər Nazirliyinin mətbuat xidmətinə istinadla xəbər verir ki, əməliyyat Yavər Fərzəliyevə məxsus “Farklı Lahmacun” çay evində keçirilib. DİN-in mətbuat xidmətinin məlumatına görə, çay evinin zirzəmisində qanunvericiliklə müəyyən edilməmiş qaydada təşkil olunan dini yığıncaqda iştirak edən, aralarında azyaşlılar da olmaqla 42 nəfər saxlanılıb: “Həmin ünvana baxış zamanı dini nifrət aşılayan və dözümsüzlüyü təbliğ edən müxtəlif məzmunlu kitablar və digər növ ədəbiyyat aşkar edilərək götürülüb. Qanunsuz yığıncağın təşkilatçıları – Zaqatala rayon sakinləri Kamran Mustafayev, Adil Rəcəbov və Bakı şəhər sakini Zaur Şabanov şübhəli şəxs qismində saxlanılıb və barələrində Cinayət Məcəlləsinin 168-ci (dini ayinlərin icrası adı altında vətəndaşların hüquqlarını qəsb etmə) maddəsi ilə cinayət işi başlanıb.
Digər iştirakçılar haqqında isə inzibati qaydada protokol tərtib edilərək baxılması üçün aidiyyəti üzrə məhkəməyə göndərilib”.
