Mobil nömrə satışındakı dəyişiklərin test mühitində tətbiqinə başlanıb
Azərbaycanda mobil nömrə satışı ilə bağlı dəyişikliklərin test mühitində tətbiqinə başlanılıb. Novator.az Rabitə və Yüksək Texnologiyalar Nazirliyinə istinadla xəbər verir ki, artıq ölkədəki bütün operatorlar mobil nömrə satışı üzrə dəyişiklikləri test mühitində tətbiq etməkdədir və bu günə qədər bir çox satış məntəqəsində proses yeni qaydalara uyğun şəkildə aparılıb.
Bu, Rabitə və Yüksək Texnologiyalar Nazirliyinin Məlumat Hesablama Mərkəzində (MHM) “Azercell Telekom” MMC, “Bakcell” MMC və “Azərfon” MMC-nin nümayəndələri ilə keçirilən görüşdə müəyyən olunub.
Görüşdə bildirilib ki, nömrə satışı zamanı mobil nömrənin operatorların şəbəkəsində aktivləşdirilməsi üçün ərizəçiyə aid məlumatlar “Elektron hökumət” portalına qoşulmuş informasiya sistemləri vasitəsilə ilkin mənbədən identifikasiya edilərək, onlayn rejimdə elektron formada operatorların və MHM-in vahid məlumat bazasına daxil ediləcək.
Qeyd edək ki, Nazirlər Kabinetinin 22 may 2015-ci il tarixli 200 nömrəli qərarına əsasən “Rabitə müəssisələri (operatorlar) tərəfindən rabitə vasitələrinin satışı və istifadəsi zamanı tələb olunan şərtlərin təsdiq edilməsi haqqında” 2005-ci il 7 iyul tarixli 131 nömrəli qərara dəyişikliklər edilib. Yeni qərar nömrələrin satışının mərkəzləşmiş qaydada, ümumi müddəalara uyğun bütün mobil operatorlar tərəfindən eyni qaydada aparılmasını nəzərdə tutur.
