Sabiq prezident insanlığa qarşı cinayətdə suçlanır
Rumıniyanın sabiq prezidenti İon İliyesku insanlığa qarşı cinayətdə ittiham olunur.
Novator.az xəbər verir ki, prokurorluq İliyeskonu ona qarşı cinayət işinin başlandığı barədə məlumatlandırıb.
Cinayət işi 1990-cı ilin iyununda Buxarestdə baş vermiş hadisələrlə bağlıdır.
Həmin ilin aprelində Rumıniyada İliyeskunun rəhbərlik etdiyi Milli Xilas Cəbhəsi seçkidə qalib gəlib. Lakin seçkidən əvvəl başlanan mitinqlər seçkidən sonra da davam edib. Mitinqlər iğtişaslara gətirib çıxarıb. Üç ay ərzində paytaxt Buxarestin mərkəzində avtomobillərin hərəkəti dayanıb və yüzlərlə nümayişçi barrikadalar quraraq gecə-gündüz keçmiş kommunistlərin hakimiyyətə gəlişinə etiraz edib.
İyunun 13-də səhər saatlarında polis etirazçıları meydandan qovmağa başlayıb və şəhərin mərkəzində qanlı qarşıdurmalar yaranıb. Nümayişçilər güc strukturları, televiziya, radio və digər dövlət müəssislərinin binalarına hücum ediblər. Onda İliyeskunun çağırışı ilə Valya Jiuluy bölgəsindən 10 minə yaxın şaxtaçı hakimiyyətin köməyinə gəlib. Şaxtaçılar polis və ordu bölmələri ilə birlikdə nümayişçiləri qovublar. Bu zaman qarşıdurmalarda 6 min adam həlak olub, 542 nəfər yaralanıb, 1000-ə yaxın adam həbs olunub.
İliyesku açıq-aşkar şaxtaçıların hərəkətlərini dəstəkləyib və “demokratiyanı bərpa etdiklərinə görə” onlara təşəkkür edib.
Prezident postunu tərk edəndən sonra müxalifət liderləri İliyeskunun toxunulmazlıq hüququndan məhrum olunmasını və məhkəməyə verilməsini tələb ediblər.
2005-ci ildə şaxtaçılarla qarşıdurmada baş vermiş ölümlərə görə İliyeskuya ittihamlar irəli sürülsə də, iş nəticəsiz başa çatıb.
İliyesku 1990-1996 və 2000-2004-cü illərdə Rumıniyanın prezidenti postunu tutub.
