Putin: “Keçmiş Sovet İttifaqından ən azı 4 min adam İŞİD-ə qoşulub”
Oktyabrın 20-də Moskvada Suriya prezidenti Bəşər Əsədi qəbul edərkən Rusiya prezidenti Vladimir Putin İŞİD-dən də danışıb.
Novator.az xəbər verir ki, Putin keçmiş Sovet İttifaqı məkanından ən azı 4 min adamın İŞİD sıralarında vuruşduğunu deyib: “Təəssüf ki, keçmiş Sovet İttifaqı ölkələrindən ən azı 4 min adam Suriya ərazisində əlində silah hökumət qüvvələrinə qarşı vuruşur. Bu bizi narahat edir. Əlbəttə ki, biz artıq hərbi təcrübə qazanmış və ideoloji hazırlıq keçmiş o adamların Rusiya ərazisinə gəlməsinə imkan verə bilmərik”.
Bəşər Əsədin Moskvaya səfər etdiyini Rusiya tərəfi oktyabrın 21-də açıqlayıb. Rusiya prezidentinin mətbuat katibi Dmitri Peskov səfər zamanı Bəşər Əsədin Rusiya prezidenti Vladimir Putinlə təkbətək və geniş tərkibdə görüşlər keçirdiyini deyib. Məlumat görə, Bəşər Əsəd Vladimir Putini Suriyadakı vəziyyət və hökumət qoşunlarının planları haqda məlumatlandırıb.
Bəşər Əsəd 2000-ci ildən prezidentdir. Suriyada 2011-ci ilin mart ayında onun hakimiyyətdən getməsi tələbi ilə başlayan aksiyalar sonradan vətəndaş müharibəsinə çevrilib. İndiyəcən on minlərlə insan qurban gedib.
2015-ci ilin oktyabrında Vladimir Putin bildirib ki, Rusiyanın Xəzər dənizindəki hərbi gəmiləri İŞİD-in Suriyadakı obyektlərini atəşə tutub. Putin deyib ki, bunu Rusiyadan Suriya hakimiyyəti xahiş edib.
