Mitinqçiləri saymaq üçün kompüter proqramı hazırlanıb
Mitinqdə, nümayişlərdə adamları saymaq üçün kompüter proqramı hazırlanıb. Novator.az xəbər verir ki, proqramı ABŞ-ın Mərkəzi Florida Universitetinin mütəxəssisləri hazırlayıblar.
Bir qayda olaraq nümayişlərdə, mitinqlərdə iştirak edənlərin sayı gözəyarı, ərazi vahidinə düşən adamların vizual hesablanması üsulu ilə müəyyən edilir. Bu zaman nəticələr orta hesabla, yəni təxmini aparılır.
İndi amerikalı mütəxəssislərin hazırladığı proqram təminatı bu işin avtomatik, operativ və düzgün həyata keçirilməsinə imkan yaradacaq. Bu proqram aksiya yerində yuxarıdan, yüksəklikdən çəkilmiş fotoşəkilləri (aero-fotolar) analiz edərək bir saata yaxın müddətdə toplaşan adamların sayını müəyyənləşdirir.
Mərkəzi Florida Universitetinin informatika üzrə professoru Mübarək Şah belə bir proqramın hələ heç yerdə olmadığını deyib. Mübarək Şahın fikrincə, proqramdan təkcə mitinq və nümayişlərdə insanların sayını hesablamaq üçün yox, açıq havada keçirilən başqa ictimai tədbirlərdə də istifadə oluna bilər. Professor vurğulayıb ki, proqram fövqəladə hallarda insan həyatının vaxtında xilas olunmasına da yardım edə bilər.
