63,5 min nəfər gənc ilk dəfə səs verəcək
Noyabrın 1-də Milli Məclisə keçiriləcək seçkilərdə 63,5 min nəfər gənc ilk dəfə səs verəcək. Seçki günü 257 nəfərin 18 yaşı tamam olacaq.
AZƏRTAC xəbər verir ki, bu fikir parlament seçkilərində gənclərin fəallığı üzrə gənclər təşkilatlarının nümayəndələri ilə oktyabrın 20-də keçirilən görüşdə səsləndirilib.
Prezident yanında Gənclər Fondunun təşkilatçılığı ilə keçirilən görüşdə prezidentin ictimai-siyasi məsələlər üzrə köməkçisi Əli Həsənov, gənclər və idman naziri Azad Rəhimov, Mərkəzi Seçki Komissiyasının (MSK) sədri Məzahir Pənahov, gənclər təşkilatlarının rəhbərləri və nümayəndələri iştirak edirlər.
Əli Həsənov tədbirdə deyib ki, “bu gün gənlciyin əsas vəzifələrindən biri də seçkilərdə fəal iştirak etməkdir”. Prezidentin köməkçisi gənclərin seçkilərlə bağlı geniş təbliğati və maarifləndirmə işləri aparmalarının, eləcə də ölkədə seçkilərin demokratik şəraitdə keçirilməsinə mane olmağa çalışan qüvvələrə qarşı fəal olmalarının vacibliyini diqqətə çatdırıb.
