Milli təhlükəsizlik naziri işdən çıxarıldı
Oktyabrın 17-də prezident İlham Əliyev general-polkovnik Eldar Mahmudovun milli təhlükəsizlik naziri vəzifəsindən azad edilməsi haqda sərəncam imzalayıb.
Dövlət başçısı milli təhlükəsizlik naziri postuna hələ ki, yeni təyinat etməyib.
Eldar Mahmudov 1956-cı ildə Bakıda anadan olub. 1978-ci ildə D.Bünyadzadə adına Xalq Təsərrüfatı İnstitutunun maliyyə-kredit, 1993-cü ildə isə Bakı Dövlət Universitetinin hüquq fakültəsini bitirib. Silahlı Qüvvələrin sıralarında müddətli həqiqi hərbi xidmət keçib.
1980-2004-cü illərdə daxili işlər orqanlarında xidmət edib, mütəşəkkil cinayətkarlıqla mübarizə, cinayət-axtarış strukturlarında çalışıb.
1993-cü ildə Daxili İşlər Nazirliyinin Narkotiklərlə Mübarizə İdarəsində şöbə rəisi vəzifəsinə təyin edilib, bir müddət sonra həmin idarənin rəis müavini olub.
1993-2003-cü illərdə İqtisadi Cinayətkarlığa Qarşı Mübarizə İdarəsinin və İqtisadi sahədə Əməliyyat-Əlaqələndirmə Bürosunun rəisi vəzifələrində işləyib. 2004-cü ilin əvvəlindən isə Narkotiklərlə Mübarizə Baş İdarəsinin rəisi vəzifəsinə təyin edilib.
2004-cü il iyulun 23-də milli təhlükəsizlik naziri təyin olunub və general-mayor hərbi rütbəsi alıb.
2005-ci il martın 16-da general-leytenant, 2014-cü il martın 27-də general-polkovnik hərbi rütbəsini alıb.
Ailəlidir, üç övladı var.
