“YouTube”da milyonlarla pul qazanan adamların siyahısı
“Forbes” jurnalı “YouTube” kanalında ən çox pul qazanan videobloqçuların reytinq cədvəlini tərtib edib.
Novator.az xəbər verir ki, ən çox pul qazanan videobloqçuların siyahısına “PewDiePie” ləqəbli İsveç videobloqçusu Feliks Kyellberq başçılıq edir. Onun “YouTube” kanalındakı səhifəsi video oyunlardan ibarətdir. 2015-ci ilin iyun ayının 1-nə olan məlumata görə, 40 milyondan çox abunəçisi olan Feliks 12 milyon ABŞ dolları qazanıb.
Siyahıda ikinci yerdə iki duet gəlir. Hər duetin ayrı-ayrılıqda 8,5 milyon dollar qazancı olub. Biri Yen Xekoks və Entoni Padillanın “Smosh” adlı komediya dueti, o biri Rafi və Benni Fayn qardaşlarının “Fine Brothers” duetidir. Bu ilin iyun ayında “Smosh”un ilk tammetrajlı filmi də çıxıb.
“YouTube”da ən çox pul qazanan videobloqçuların siyahısında sonrakı yerlərdə aktrisa Lindsi Stirlinq (6 milyon dollar), “Rhett & Link’s” (4,5 milyon dollar) komediya dueti, qadın gözəlliyindən bəhs edən bloqçu Mişel Fen (3 milyon dollar), yumorist Lilli Sinx (2,5 milyon dollar), pranker (telefon məzhəkəçisi) Romen Etvud (2,5 milyon dollar), aşpaz Rozanna Panzino (2,5 milyon dollar) gəlirlər.
