Hər gün Azərbaycanın hava məkanı ilə 400-450 uçuş həyata keçirilir
Azərbaycan Dövlət Mülki Aviasiya Administrasiyası ölkənin hava məkanının istifadəsinə heç bir məhdudiyyətin olmadığı barədə bəyanatla çıxış edib.
Bəyanatda deyilir ki, Azərbaycanın hava məkanının sahəsi Xəzər dənizinin hissəsi də daxil olmaqla 168 min kvadrat kilometr təşkil edir: “Hazırda Azərbaycan hava məkanının istifadəsinə heç bir məhdudiyyət yoxdur”.
Administrasiyanın məlumatına görə, hər gün Azərbaycan hava məkanı ilə təxminən 400-450 uçuş (o cümlədən tranzit uçuşlar) həyata keçirilir. Onların arasında “Qatar Airways”, “Turkish Airlines”, “Lufthansa”, “Air France”, “British Airways”, “Singapore Airlines” və digər dünya şirkətlərinin hava gəmiləri var.
Azərbaycan Dövlət Mülki Aviasiya Administrasiyası bəyan edir ki, uçuşlar bütün təhlükəsizlik tədbirləri və normalarına riayət olunmaqla Beynəlxalq Mülki Aviasiya Təşkilatının (ICAO) standartlarına və tövsiyələrinə uyğun həyata keçirilir.
